Marcos Calveiro, gañador do Raíña Lupa

O libro Centauros do Norte de Marcos Calveiro gañou a VIII edición do Premio Raíña Lupa de literatura xuvenil. A través do seu blog, o escritor definiu esta obra como a súa "a miña particular homenaxe ao cine e a todas as horas da miña infancia que pasei diante dun TV en branco e negro vendo un western tras outro".
Centauros do Norte está protagonizado por un adolescente de 17 anos que vive unha serie de aventuras iniciáticas en México, en plena revolución de Pancho Villa. Entre os 34 textos presentados a concurso, o xurado acordou premiar por unanimidade a narración de Calveiro pola "boa estrutura" da súa obra, así como a súa capacidade para crear personaxes, manténdose sempre "á marxe" de calquera posicionamento valorativo sobre a revolución mexicana. Coordinado por Xabier P. Docampo, o xurado estivo integrado polo editor Alfonso García Sanmartín, a escritora e secretaria xeral da AELG, Mercedes Queixas, a directora do Servizo de Bibliotecas do Concello da Coruña, Elena Pernas, o gañador da anterior edición do premio, Carlos López, e a crítica Isabel Soto.
O Raíña Lupa está convocado pola Deputación da Coruña e premia ao gañador con 6.500 euros e a edición da obra. Marcos Calveiro (Vilagarcía, 1968) suma un novo recoñecemento á súa obra literaria logo de ter acadado o Ala Delta, Barco de Vapor ou Lazarillo, consolidándose como un dos autores imprescindibles da nosa literatura infantil-xuvenil.

Teresa González Costa, gañadora do Premio Merlín

O xurado da 25ª edición do Premio Merlín de literatura infantil dotado con 10.000 euros e formado por An Alfaya (Premio Merlín, 1997), Jacobo Fernández Serrano (Premio Merlín, 2009), Antonio García Teijeiro (Premio Merlín, 1996), Mar Guerra (Premio Merlín, 2008), Gloria Sánchez (Premio Merlín, 1990), e Helena Pérez Fernández (secretaria do xurado), en representación de Xerais, con voz e sen voto, entre as trinta e dúas obras participantes, acordou por maioría declarar como gañadora a presentada baixo o lema «Celerífera», que, despois de aberta a plica, resultou ser de Teresa González Costa e corresponde ao título A filla do ladrón de bicicletas.
A filla do ladrón de bicicletas conta a historia dunha nena, Serafina, que é filla dun ladrón de bicicletas e que por diversas circunstancias vive coa súa tía, dona Perfecta. A súa máxima aspiración é ser equilibrista nun circo con Celerífera, a bicicleta, e cara a iso van enfocados todos os seus esforzos, aos que non serán alleos nin a axuda do vello Elías nin as dificultades que lle ocasionan a panda de Martiño o Bravo.Teresa González Costa declarou cando soubo da concesión do premio que «as bicicletas sempre foron moi importantes na miña vida, nesta obra co personaxe de Celerífera quixen facerlle unha homenaxe as bicicletas». Proseguiu expresando que á súa protagonista, Serafina, «o que máis lle gusta é pasar o tempo subida en Celerífera. A tía Perfecta, en cambio, asegura que andar en bicicleta carece de elegancia. Cada un dos personaxes da historia ten a súa palabra acerca dese artefacto fascinante que xa fora ideado por Leonardo da Vinci. A simplicidade de Celerífera contrasta co entramado de sentimentos que Serafina esperta na vila, alimentados pola sombra de todas as bicicletas que unha noite desapareceron.» «Na súa carreira pola corda frouxa Serafina non tardará en aprender que un rumor pode ser máis terrible que unha tormenta electromagnética...»